Dasih.. Sih.. Kinasih
(Diyah
Laras Santi)
Tumuruning sang ranu
Tumetes saka netraku
Anelesi jiwa
Kang tanpa tresna
Praptamu..
Ngusadani
laraning ati
Praptamu..
Pindha
sumunaring bagaskara.
Kang
madhangi jagad
Tanpa sumunarmu,
Manungsa tanpa daya
Sumunara aneng uripku, Dasih
Nganti sang bagaskara
Datan bisa sumunar maneh.
Dasiiiiiiiiiihhhhhh
Dasiihhh
Siih
Dadya
salawase
Sih
Kang
kinasih.
Temanggung,
22 Januari 2017.
Payungan Banyu Udan
(Hyuda)
Kumepyak
Nalika reroncenan udan ambyar ing tapak
tilas
Njelma dadi kembang trate aneng kali
alas
Ngancani lakune janma kang ngemis welas
Ngrudapeksa nundhung rudah tanpa ancas
Hamung
udan kang bisa ngantheni
Tetes-tumetese
dadi payung luhku mili
Tembung
“Sing ngati-ati” dak kekep jero aneng
ati
Minangka
tembung pungkasan nyekseni aku bali
Pujaningsun,
Aja lali karo janji
Setyamu sing dak anti-anti
Minangka daya kang ndayani
Nganti titiwanci rong janma nyawiji.
Semarang,
22 Januari 2017
Tresna Kang Kinasih
(Hyuda)
Kinasih,
Esem kang kasungging aneng pasuryanmu,
Amung kuwi kang dadi dayaku.
Sunar tan bisa sumunar,
Yen ta mega mendhung mampir aneng
netramu.
Kinasih,
Aku
ora bisa njelma surya nalika rina teka,
Yen
sliramu isih singeban tatu.
Lan..
Aku ora bisa
dadi candra nalika peteng ngraja,
Yen sliramu isih
kabuntel tresna sing ora cetha.
Kinasih,,
Aku dudu empuning tresna.
Sebab aku ya butuh sih tresna.
Aku ya dudu dewaning tresna
Jalaran sejatining tresna,
Hamung duweke dzat kang maha tresna.
Tresna kang
kinasih...
Ranu sing abyor
ing tawang netramu
Mugya dadi pungkasaning
luh tinatu
Lan ganti dadi
luh gumuyumu....
Semarang,
23 Januari 2017.
Sinandhing
(Diyah
Laras Santi)
Nyawiji
Siji
Nyawiji dadi siji
Jaler lan estri
Nyawiji dadi siji
Nyawijining
rong janma
Kang
kebak ing tresna
Nggagayuh
apa kang dadi gegayuhan
Lestariya
sedaya kang kaesthi
Kudangane
sang juru wicara
Mugi katekan
Sineksen wong tua lan tangga
Sesandhingan karo sang raja
Nadyan mung raja sedina
Kebak ing kabagyan
Ngguya-ngguyu
Mesam-mesem...
Mugi
katekan
Mugi
gusti mangestoni
Temanggung,
23 Januari 2017.
(Dak suwun bareng-bareng memuji,
muga apa kang kaesthi bisa
kasembadan)
Estu, Pangestu Mangestoni
(Hyuda)
Mangestoni jiwa janma kang nyawiji,
Lumantar karsa nglaras rasa.
Rasa kang nyata sing ora nyata,
Nyatane sarasa rasa kang raras arum.
Arum gandane
sumigrak ambyar ing kabagyan.
Kabagyan kang
kadya bagaskara tanpa aling-aling mega.
Cumlorot anget
madhangi jagad.
Jagade janma
kang kebak tresna.
Tresna kang
nyata sing ora nyata.
Nyatane amung sira, ora ana liya.
Liyane lila lali marang laku kang
kapungkur.
Umpamaa ana, paling pujangga lali nulis
crita.
Yaaaaa
muga-muga....
Muga-muga sing
maha tresna uga lila.
Lila nglilani
lan mangestoni,
Mangestoni rong
janma nyawiji.
Nyawiji
tresnane, nyawiji rasane, nyawiji pandongane.
Pandongane yaiku
nyawiji selawase.
Semarang,
24 Januari 2017.
Oneng
(Diyah
Laras Santi)
Gumuyumu pindha rembulan
Kang sumunar ing madyaning rembulan
Sumorot ngenani pucuking cemara
Endah tanpa langenan.
Cahyane
ngintip aneng plataran.
Maweh
padhang kang koneng.
Dasih,,
Muga
bakal teka
Anutupi
kaendahaning candra
Dak jaluk cahyamu ora sirna
Amung cahya kang katutup mega
Nanging rasa tetep ngrembaka
Rina
datan karasa
Ratri
tansah gegirisi
Nalika
mung wewayangan amitrani
Dhuh hyang suksma..
Menika raos menapa,?
Dhuh hyang maha tresna
Muga enggal antuk tamba.
Temanggung,
24 Januari 2017.
(3 dinten boten
kepanggih,
kraos sampun dangu
banget.
Pranyata kapang iki
nyiksa ati, Dasih)
Dasih
(Hyuda)
Tamba apa sing kudu
dak goleki?
Nalika ati
ngramu tekamu yayi?
Amung tembung
dasih kang katembang
Bebarengan karo
thukule lintang
Endah
kerlap-kerlip ing tawang
Pindha mustikaning
ywang
Dasih,
Uga tembung kang katembang
Nalika oneng nganglang
Rondha aneng panyawang
Nadyan ta rasane
seseg ing ati
Nanging ati
datan bisa getuni
Jalaran kuwi
wernaning ati
Werna kang
marnani
Dasih,
Aku pitayaa marang gusti
Yen ta kuwi bakal endah ing
titiwanci
Sebab kuwi wis dadi pepesthene
gusti.
Semarang,
25 Januari 2017.
Impen
(Diyah
Laras Santi)
Salawase?
Muga ora mung
ujare
Muga bisa dadi
nyata
Ora mung kandheg
ing kandha
Merga tansah
kelara-lara
Yen ta kuwi mung
setya
Aku nyumpena
Yen ta aku karo
priya liya
Sesandhingan
kaya dene raja
Amarga dhawuhe
wong tua
Aku mung bisa
muwun
Mangewu-ewu
getun
Ora bisa
lestantun
Muga mung
wewayangan
Kang ora bakal
katekan
Muga amung
weweden
Kang kandheg ing
sajroning impen.
Temanggung,
25 Januari 2017.
(wungu-wungu langsung
muwun,
ajrih menawi dados kasunyatan)
Impen Kang Kagurit
(Hyuda)
Impen,
Sawijining alam
kang ora sineksen
Kadhang ngambar
ganda kabagyan
Kadhang nyawur
rasa miyur
Nalika impenmu kagurit
Rasaning ati kaya dene kasuwir
Dayaku asat ora sisa
Dayaku minggat ninggalake raga
Yen ta kuwi
pratandha
Muga ora padha
sing dak pikirna
Yen ta kuwi
kembang turu
Muga aja gawe
tatu
Yen ta kuwi
piweling
Muga bisa dadi
pangiling
Semarang,
26 Januari 2017.
Gusti
(Diyah
Laras Santi)
Gusti,
Gusti pamurba
jagad raya
Pamisesa alam
donya
Sembah sujud kula katur,
Wonten ngarsanipun paduka.
Gusti,
Kula amung
kawula alit
Kang kebak ing
dedosan,
Kanthi esthi
ning manah, dhuh Gusti,
Nyuwun agunging
pangapunten dosa kula
Gusti,
Gusti pamurba jagad raya,
Pamisesa alam donya,
Gusti kang maha
kuwasa
Kang maha pirsa
Kang maha tresna
Paringana marga
Lampah sih tresna menika
Temanggung,
26 Januari 2017.
Tresnaku Ginawa Mati
(Hyuda)
Menika laku kang
kebak carita!
Ngganda tresna
kadya mimi lan mintuna
Rasa kang nora
bisa kapegatake kelawan sapa,
Sapa kowe....
Sapa aku...
Uga sapa dhekne...
Jalaran amung
gusti kang nitis rasa.. ora manungsa...
Yen sira pitaya kinasih...
Gusti ora bakal kleru nitik rasa.
Rasa kang tinitis, wis katitik saben
manungsa
Hamung kelawan
donga lan manengku puja,
Muga Gusti kersa
paring daya.
Ndayani tresna
lan janji prasetya
Ya...
Tresnaku lan
tresnamu,
Sing wis dadi
kanugrahaning Gusti.
Muga ora mung
sawetara,
Nanging, nganti
tumekaning pati
Muga gusti ora
mung gojeg blaka
Nangin, pancen
rasa sing wis pinesthi.
Semarang,
27 Januari 2017
Pangilinging Laku
(Diyah
Laras Santi)
Pangiling laku
Laku tama janma
manungsa
Nora liya
kahanan ing donya
Bisa arupa tandha sasmita
Saka Sang Hyang Suksma
Kanggo wujuding Purba wisesa
Sang narendra
Narendra ing
jagad raya..
Muga datan ana rubeda
Apa maneh godha
rencana
Nir ing sambikala
Lampahnya
Kula lan paduka
Nganti impen kang endah bisa tumanja
Dadya
Salah sijining
pangiling laku tama
Kang njejege
laku
Kang njurung
laku
Kang dadi
pamong-ku.
Temanggung,
27 Januari 2017.
Puja-Pamuji
(Hyuda)
Pamong-ku,
Pamong kang
satuhu
Satuhu ing rasa
pangrasaku
Satuhu sajroning
luh katresnanku
Kanthi ilining ludiraku
Puja-pamujiku tansah mbanyu biru
Ngreksa rasa, nglaras laku
Supaya adoh saka bebendu
Pamong kang
satuhu
Pamong kang
sajati
Pamomong ing
laku
Pamomong ing
pati
Amung gusti sawiji
Kang murbeng dumadi
Amung gusti sawiji
Kang kebak pamuji
Semarang,
30 Januari 2017.
Rina lan Ratri
(Diyah
Laras Santi)
Pinesthining
Gusti
Tumekaning rina
lan ratri
Pinesthining
Gusti
Yen rong janma
nyawiji
Rina tumeka sawuse ratri
Sawuse ratri ana rina
Rina lan ratri tumeka gumanti
Aja cuwa ana
ning wengi
Merga wengi
mesti gumanti
Percaya marang
kersaning Gusti
Merga Gusti ra
bakal balenjani
Temanggung,
29 Januari 2017.
